Monday, May 11, 2020

വിശ്വാസങ്ങൾക്കതീതമായ സംശയങ്ങൾ

എത്ര തരം വിശ്വാസങ്ങൾ ഉണ്ടെന്ന് വല്ല കയ്യും,  കണക്കുമുണ്ടോ?  പറയു, നിങ്ങളിലാരെങ്കിലും എപ്പൊഴെങ്കിലും വിശ്വാസങ്ങളുടെ കടക്കെടുക്കാനിരുന്നിട്ടുണ്ടോ?

ഹിന്ദുമത വിശ്വാസം
ക്രിസ്തുമത വിശ്വാസം
ബുദ്ധമത വിശ്വാസം
ജൈന മത വിശ്വാസം
കപട വിശ്വാസം
ദൈവ വിശ്വാസം
ചെകുത്താൻ വിശ്വാസം
അന്ധവിശ്വാസം
ആത്മ വിശ്വാസം
ഭാര്യക്ക് ഭർത്താവിലും, ഭർത്താവിനു ഭാര്യയിലുമുള്ള വിശ്വാസം
അച്ഛനുമമ്മക്കും, മക്കളിലും, മക്കൾക്ക് തിരിച്ചുമുള്ള വിശ്വാസം
സഹോദര, സഹോദരി വിശ്വാസം.
ശിഷ്യർക്ക് ഗുരുവിലുള്ള വിശ്വാസം
ഗുരുവിനു ശിഷ്യരിലുള്ള വിശ്വാസം
രോഗിക്ക് ഡോക്ടറിലുള്ള വിശ്വാസം
ഡോക്ടർക്ക്  രോഗിയിലുള്ള വിശ്വാസം
കൊടുക്കുന്ന മരുന്നിലുള്ള വിശ്വാസം,
കഴിക്കുന്ന മരുന്നിലുള്ള വിശ്വാസം
കഴിക്കുന്ന ഭക്ഷണത്തിലുള്ള വിശ്വാസം
വിളമ്പുന്ന ആളിലുള്ള വിശ്വാസം
ഓടിക്കുന്ന വാഹനത്തിലുള്ള വിശ്വാസം
എന്തിനു, നാളെ എന്റെ പശു ഇരുപത് ലിറ്റർ പാലു തരുമെന്ന വിശ്വാസം
ഇക്കൊല്ലം മാവും, പ്ലാവും ഇത്തറ മേനി കായ്ക്കും എന്ന വിശ്വാസം
ഇന്നെന്തായാലും ഒരു രണ്ട് മൂന്ന് ശവപെട്ടിയെങ്കിലും വിറ്റു പോവും എന്ന ശവപെട്ടിക്കാരന്റെ വിശ്വാസം

വിശ്വാസങ്ങളുടെ പട്ടികയെടുത്താൽ ഒരെത്തും പിടിയും കിട്ടാത്തയത്ര വിശ്വാസങ്ങളാണു നമുക്കു ചുറ്റും,

വിശ്വാസങ്ങളെ മാറ്റി നിറുത്തികൊണ്ട് മനുഷ്യനു ഒരു നിമിഷം പോലും മുന്നോട്ട് പോവാനും കഴിയില്ല.

വിശ്വാസങ്ങളുടെ ഒരു വന്മതിൽകെട്ടിനുള്ളിൽ ബന്ധനസ്ഥരാണു നാമേവരും!  അല്ലായെന്ന് പറയുവാൻ ആർക്കു കഴിയും?

ചില വിശ്വാസങ്ങൾ അങ്ങിനെയാണു, പ്രത്യേകിച്ച് കാര്യവും കാരണവുമൊന്നും കൂടാതെ നമ്മൾ പിൻതുടരുന്നവ!

എനിക്കുമുണ്ട് ചില വിശ്വാസങ്ങൾ.   അറിഞ്ഞോ, അറിയാതേയോ പിൻ തുടർന്നു വന്നവ, അല്ലെങ്കിൽ ശീലമായ   ചില വിശ്വാസങ്ങൾ!

അതിലൊന്നാണു, ദിവസവും രാവിലെ, വണ്ടി സ്റ്റാർട്ട് ചെയ്ത് യാത്ര തുടങ്ങും മുൻപ് ഡേഷ് ബോർഡിൽ അരക്കിട്ടുറപ്പിച്ച് വച്ചിരിക്കുന്ന വിഗ്നേശ്വരനെ ഒന്ന് തൊട്ട് നെറുകയിൽ വക്കുക എന്നത്!

സംഭവം വളരെ വർഷങ്ങൾക്ക് മുൻപാണു, അന്നെന്റെ ഇളയ മകൾ വളരെ ചെറിയ കുട്ടിയാണു.

ഒരു വെള്ളിയാഴ്ച രാവിലെ തന്നെ  സകുടുംബം ഗ്രോസറി ഷോപ്പിങ്ങിനായി പുറപെട്ടു, പാർക്കിങ്ങിൽ ചെന്ന് വണ്ടിയിൽ കയറി സ്റ്റാർട്ട് ചെയ്തു.  പതിവുപോലെ തന്നെ, നമ്മുടെ വിഘേശ്വരനെ ഒന്ന് തൊട്ട് നിറുകയിൽ വച്ചു, പോവാംല്ലേന്നാ ഭാവത്തിൽ തലതിരിച്ചൊന്ന് പുറകിലേക്ക് നോക്കി.

കുഞ്ഞി കണ്ണുകളിൽ സംശയത്തിന്റെ വേലിയേറ്റം.

എന്താ മോളൂ?  എന്ത് പറ്റി?

അച്ഛാ, അച്ഛൻ എന്തിനാ എപ്പോഴും വണ്ടിയിൽ കയറുമ്പോൾ ഗണപതി ഗോഡിന്റെ തലയിൽ അടിക്കുന്നത്?

പഴവങ്ങാടി ഗണപതിക്ക് തേങ്ങയുടച്ച ഒരു എഫക്ടായിരുന്നു!

3 comments:

കുറുമാന്‍ said...

വിശ്വാസങ്ങൾക്കതീതമായ സംശയങ്ങൾ

ഇടക്കൊന്നു അനങ്ങണ്ടേ ഇവിടേം

Russel said...

അനങ്ങേണ്ട നിങ്ങളൊക്കെ ഇങ്ങനെ അനങ്ങാതിരുന്നാല്‍ എങ്ങനെ അനക്കം ഉണ്ടാകും

Muralee Mukundan , ബിലാത്തിപട്ടണം said...

അറിഞ്ഞും അറിയാതെയും പല
വിശ്വാസങ്ങളെ പിന്തുടരുന്നന്നവരാണ് നാം ഏവരും ...