Tuesday, July 03, 2007

അയ്യപ്പന്റെ മീന്‍ പിടുത്തം

സംഭവം നടക്കുന്നത് അഞ്ച് കൊല്ലങ്ങള്‍ക്ക് മുന്‍പ് ദുബായില്‍ വച്ചാണ്. അന്ന് ഞാനും, എന്റെ നല്ല പാതിയും യാതൊരു വിധ അല്ലലുകളും ഇല്ലാതെ താമസിക്കുന്ന സുവര്‍ണ്ണ കാലഘട്ടം. ഓഫീലെ അല്ലറ ചില്ലറ പണികളൊക്കെ ചെയ്യുന്നതിനു പുറമെ ഉണ്ടായിരുന്ന ഭാരിച്ച ജോലി, സമയാ സമയത്തിനു നല്ല പാതി ഉണ്ടാക്കിതരുന്ന ഭക്ഷണം കഴിച്ച് ശരീരത്തിനെ പുഷ്ടിപെടുത്തുക എന്നത് മാത്രം. ചുരുക്കം പറഞ്ഞാല്‍, തിന്നും കുടിച്ചും, വയറിലെ മസ്സിലുകളെ ബലപെടുത്തുക അത്ര തന്നെ (അസൂയക്കാര്‍ അതിനെ കുടവയറെന്ന് പറയുന്നതെന്ത് വിഡ്ഡിത്തരമാണെന്നാലോചിച്ചിട്ട് എനിക്കിപ്പോഴും ഒരു പിടിയുമില്ല).

അന്ന് ഇന്നത്തെ പോലെ മലയാളം ബ്ലോഗിങ്ങൊന്നും ഇല്ലാതിരുന്നതിനാല്‍ നല്ല മനസ്സമാധാനം, നല്ല സുഹൃദ് ബന്ധങ്ങള്‍ (ബ്ലോഗില്‍ വന്നതിനുശേഷം ആരാ പിന്നീന്ന് കുത്ത്വാന്ന് പറയാന്‍ പറ്റാത്ത ഭീകരാവസ്ഥ, എപ്പോ എവിടുന്ന്/ആരുടേന്ന് കിട്ടീന്ന് ചോദിച്ചാല്‍ മതി), സന്തോഷകരമായ കുടുംബ ജീവിതം, ഇഷ്ടം പോലെ ഒഴിവു സമയം. നല്ല പാതിക്ക് മിച്ച സമയത്തിന്റെ ഭൂരിഭാഗവും കൊടുത്താലും അക്ഷയ പാത്രം പോലെ ഇഷ്ടം പോലെ സമയം പിന്നേം ബാക്കി.

അങ്ങനെ മിച്ചം വരുന്ന സമയങ്ങളിലെ, പ്രത്യേകിച്ചും വീക്കെന്റുകളിലെ ബോറഡി മാറ്റാന്‍ ഉതകുന്ന ഒരു ഹോബി കണ്ടുപിടിക്കേണ്ടത് അത്യാവശ്യമായി വന്ന ഒരു ഘട്ടത്തില്‍ ഞാനും എന്റെ സുഹൃത്തായ ടെരന്‍സും കൂടി ഒരു മേശക്കും, കുപ്പിക്കും അപ്പുറവും, ഇപ്പുറവുമിരുന്ന് കൂലുങ്കഷമായി ചിന്തിക്കാന്‍ തുടങ്ങി.

ഗോള്‍ഫ് - ടെരന്‍സ് ആശയം പുറത്തെടുത്തു.

ഏയ്, അതു വേണ്ട. അതൊരുജാതി കാല്‍ കാശിനു വകയില്ലാത്ത തെണ്ടിപിള്ളാരു കളിക്കണ കളി.

എങ്കില്‍ സ്നൂക്കര്‍ ആയാലോ? അടുത്ത ആശയം ടെരന്‍സ് പുറത്തെടുത്തു.

സ്നൂക്കര്‍ കുഴപ്പമില്ല, പക്ഷെ എനിക്ക് കളിക്കാന്‍ അറിയില്ല, അതിനാല്‍ അതും വേണ്ട.

ചെസ്സ് കളിക്കാം എങ്കില്‍ - മേശപുറത്തിരിക്കുന്ന കുപ്പിയെടുത്ത് അവന്റെ തലക്കടിച്ച് കൊന്നിട്ട് ജയിലില്‍ പോയാല്‍ സമയം പോകാതിരിക്കുന്ന പ്രശ്നമേ വരില്ല എന്ന് മനസ്സില്‍ തോന്നിയെങ്കിലും, വികാരത്തെ വിവേകം കൊണ്ട് അടിച്ചമര്‍ത്തി ഞാന്‍ പറഞ്ഞു, ചെസ്സ് കളിച്ചാല്‍, ബുദ്ധിയും, ഓര്‍മ്മശക്തിയും ഒക്കെ വളരെ വര്‍ദ്ധിക്കും. ഉള്ള ബുദ്ധിയും, ഓര്‍മ്മ ശക്തിയും തന്നെ പാരയായിരിക്കുന്ന സമയത്താ അവന്റെ ഒരു ചെസ്സ് കളി. അതു വേണ്ടേ വേണ്ട.

എങ്കില്‍ നീ പറ. മേശപുറത്തിരുന്ന ഗ്ലാസെടുത്ത് വായിലോട്ട് കമഴ്ത്തി അല്പം ചൂടായി തന്നെ ടെരന്‍സ് പറഞ്ഞു.

ചൂണ്ടാന്‍ പോയാലോ? അല്പം മടിച്ച് മടിച്ച് ഞാന്‍ പറഞ്ഞു .

യൂ മീന്‍ ഫിഷിങ്ങ്?

യെസ്, ഫിഷിങ്ങ്.

വൌ ഗ്രേറ്റ് ഐഡിയ! കൊടു കൈ.

ഞാനും ടെരന്‍സും അപ്പോള്‍ തന്നെ വണ്ടിയെടുത്ത് ദേറ സിറ്റി സെന്ററില്‍ (ഇപ്പോഴത്തെ കാര്‍ഫോര്‍) പോയി, ഇരുന്നൂറോളം ദിര്‍ഹം മുടക്കി രണ്ട് ഫിഷിങ്ങ് റോഡുകളും, റീലുകളും, ആവശ്യത്തിലധികം ചൂണ്ടകൊളുത്തുകളും ഒക്കെ വാങ്ങി വന്നു. ഇനിയും രണ്ട് ദിവസം കഴിയണം വീക്കെന്റാകാന്‍. രണ്ട് ദിവസത്തിന് ഏതാണ്ട് മൂന്നു മൂന്നര ദിവസത്തിന്റെ ദൈര്‍ഘ്യം അനുഭവപെട്ടെങ്കിലും വ്യാഴാഴ്ച രാത്രി വന്ന് ചേര്‍ന്നു.

വീക്കെന്റ് ക്വാട്ടയെല്ലാം കീറി, സുഭിക്ഷമായി അത്താഴവും കഴിച്ച്, രാത്രി പതിനൊന്നു മണിയോട് കൂടി അമരത്തില്‍ കൊമ്പനെ പിടിക്കാന്‍ കടലില്‍ പോകുന്ന അശോകന്റെ അതേ അഹങ്കാരത്തോടെ ചൂണ്ടയുമെടുത്ത് നല്ല പാതിയോട് യാത്ര പറഞ്ഞിറങ്ങാന്‍ നേരം, അപ്പോ ഇനി അടുത്ത ഒരാഴ്ചക്ക്, കടയില്‍ നിന്നും മീന്‍ വാങ്ങേണ്ടല്ലോ എന്ന നല്ല പാതിയുടെ ചോദ്യത്തില്‍ ആവശ്യത്തിലധികം പരിഹാസം കലര്‍ന്നിരുന്നില്ലേന്ന് ചോദിച്ചാല്‍ ഉണ്ടായിരുന്നു.

ഉം, കളിയാക്കേണ്ട, രാവിലെ വരുമ്പോള്‍ നീയൊക്കെ മനസ്സിലാക്കും മീന്‍ പിടുത്തത്തിലുള്ള എന്റെ കഴിവ്.

ശരി, ചെല്ല്, ചെല്ല്. പിന്നെ, വല്ല വലിയമീനും, ചൂണ്ടയില്‍ കൊത്തി വലിച്ചാല്‍ വെള്ളത്തിലേക്ക് വീഴാതെ നോക്കിക്കോ. ബര്‍ദുബായ് ക്രീക്കില് ഈയിടേയായി സ്രാവുകളുണ്ടെന്നാരോ പറയുന്നത് കേട്ടു. പിന്നേം കൊട്ടി പിന്നീന്ന്.

അവിടെ അധികം സമയം നിന്നാല്‍ ശരിയാവില്ല എന്ന ഉള്‍വിളി വന്നതിനാല്‍ പെട്ടെന്നു തന്നെ സ്ഥലം കാലിയാക്കി. നേരെ വിട്ടു ടെരന്‍സിന്റെ വീട്ടിലേക്ക്.

ചൂണ്ടയില്‍ മണ്ണിരക്ക് പകരം എന്തു കൊളുത്തും എന്ന് ചിന്തിച്ച് വിഷമിച്ചിരിക്കുന്ന ടെരന്‍സിന്റെ ചുമലില്‍ തട്ടി ഞാന്‍ ആശ്വസിപ്പിച്ചു. വഴിയുണ്ടാക്കാം.

പ്രതീക്ഷാ നിര്‍ഭരമായ കണ്ണുകളോടെ അവന്‍ എന്നെ നോക്കി.

പ്രതീക്ഷാനിര്‍ഭരമായ ആ ഒരൊറ്റം നേട്ടം എന്നെ ഒരു മുക്കുവന്‍ ആക്കി മാറ്റി. ചടുലമായ നീക്കങ്ങളായിരുന്നു ഞാന്‍ പിന്നീട് നടത്തിയത്. അരകിലോ ഗോതമ്പുപൊടി കുഴച്ച് മാവാക്കി ഒരു കവറില്‍ നിക്ഷേപിച്ചു. അരക്കുപ്പി മദ്യവും, ഡിസ്പോസബിള്‍ ഗ്ലാസ്സുകളും, വെള്ളക്കുപ്പിയും, ടെരന്‍സ് ആ സമയം കൊണ്ട് ബാഗില്‍ എടുത്ത് വച്ചു.

ചൂണ്ട, ഗോതമ്പ് മാവ്, കുപ്പി, ഗ്ലാസ്സ് തുടങ്ങി അവശ്യ വസ്തുക്കളും എടുത്ത് ഞങ്ങള്‍ മത്സ്യബന്ധനത്തിനായ് കാറില്‍ പുറപ്പെട്ടു!! ഗോതമ്പ് മാവ് ചൂണ്ടകൊളുത്തില്‍ കൊളുത്തി വെജിറ്റേറിയന്‍ മീനിനെ മാത്രം പിടിച്ചാല്‍ പോരല്ലോ? അതിനാല്‍ തന്നെ പോകുന്ന വഴിക്ക് നോണ്‍ വെജിറ്റേറിയന്‍ മീനിനെ പിടിക്കുവാനായി പതിനഞ്ച് ദിര്‍ഹം ചിലവാക്കി അരകിലോ ഫ്രോസണ്‍ ചെമ്മീനും വാങ്ങി വണ്ടിയില്‍ വക്കാന്‍ മറന്നില്ല.

ബര്‍ദുബായി ക്രീക്കില്‍ വണ്ടി പാര്‍ക്ക് ചെയ്ത് ഞങ്ങള്‍ ചൂണ്ടല്‍ കിറ്റുകളെടുത്തിറങ്ങി. സമയം പന്ത്രണ്ട് കഴിഞ്ഞിരിക്കുന്നു. കാര്യമായാരും ക്രീക്കിലില്ല. അവിടേയും, ഇവിടേയുമായി ഒന്നു രണ്ട് പേര്‍ ചൂണ്ടുന്നുണ്ട്. അവര്‍ക്കിടക്കിടെ മീന്‍ കിട്ടുന്നുമുണ്ട്. കുറച്ച് നേരം അവര്‍ മീന്‍ പിടിക്കുന്നത് നോക്കി നിന്നപ്പോള്‍ ഞങ്ങള്‍ക്ക് ഹരം കയറി. അല്പം ദൂരെ മാറി ഞങ്ങള്‍ ഇരുപ്പുറപ്പിച്ചുകൊണ്ട് ചൂണ്ടുവാന്‍ തുടങ്ങി.

ഗോതമ്പ് മാവും, ചെമ്മീനും മാറി മാറി കുത്തി, ഈയം കെട്ടിയ ടാങ്കീസ് വലിച്ച് ദൂരെ വെള്ളത്തിലേക്കെറിഞ്ഞ് ഞങ്ങള്‍ ക്ഷമയോടെ കാത്തിരുന്നു. ചൂണ്ട പുറത്തെടുക്കുമ്പോഴോക്കെ നഗ്നമായ ചൂണ്ട കൊളുത്ത് കണ്ട് ഞങ്ങള്‍ പൂര്‍വ്വാധികം വാശിയോടെ മാവും, ചെമ്മീനും കൊളുത്തില്‍ കൊരുത്ത്, ചൂണ്ട പിന്നേയും വെള്ളത്തിലേക്കെറിഞ്ഞു. ഇടക്ക് ഒരു രണ്ട് പൊടിമീന്‍ കിട്ടിയപ്പോള്‍ ഞങ്ങളുടെ നിരാശയെല്ലാം ദേറ കടന്നു, സോറി പമ്പ കടന്നു. ചൂണ്ടലിന്റെ ഇടയില്‍ കുപ്പി കാലിയായത് ഞങ്ങളില്‍ ഒരു തരം ഡിപ്രഷനിടയാക്കിയെങ്കിലും, ആത്മവിശ്വാസത്തോടെ ഞങ്ങള്‍ വീണ്ടും ചൂണ്ടല്‍ തുടര്‍ന്നു.

ഗോതമ്പ് മാവും, ചെമ്മീനും കഴിഞ്ഞു. കിഴക്ക് പകലോന്‍ പൊങ്ങാന്‍ തുടങ്ങി. സമയം അഞ്ചര കഴിഞ്ഞിരിക്കുന്നു. ആകെ കിട്ടിയിരിക്കുന്നത് നാലഞ്ചു പൊടിമീന്‍. കിട്ടിയമീനെ തിരികെ വെള്ളത്തിലേക്കിട്ട് ഞങ്ങള്‍ ചൂണ്ടയെല്ലാം പെറുക്കി വണ്ടിയിലിട്ടു.

ഇതെന്താ നീ വീട്ടിലേക്ക് പോകാതെ ജുമൈറ റോഡിലേക്ക് വണ്ടി വിടുന്നത്? ടെരന്‍സ് ചോദിച്ചു.

അതേ, ജുമൈറയില്‍ ഈ സമയത്ത് പോയാല്‍ ഫിഷിങ്ങ് കഴിഞ്ഞ് വന്ന ബോട്ട്കാരുടെ കയ്യില്‍ നിന്നും വളരെ ചീപ്പായി മീന്‍ കിട്ടും. മീനില്ലാതെ വീട്ടില്‍ പോയാല്‍ അതിലും വലിയ ചീപ്പാകും. തലേന്നത്തെ ഡയലോഗുകള്‍ ഞാന്‍ അവനെ പറഞ്ഞു കേള്‍പ്പിച്ചു.

ജുമൈറയില്‍ പോയി, രണ്ട് ഇടത്തരം ഐക്കൂറയും (നെയ്മീന്‍), രണ്ട് കിലോ ശേരിയും മുപ്പത്തഞ്ച് ദിര്‍ഹം നല്‍കി വാങ്ങി (ചാളയും, അയിലയും ഒന്നും ചൂണ്ടയില്‍ പെടില്ല എന്ന് വാമഭാഗത്തിനറിയാം, ഐക്കൂറയേകുറിച്ചും, ശേരിയെകുറിച്ചും വലിയ പിടിയില്ല അതിനാല്‍ മനപ്പൂര്‍വ്വം തന്നെ അത് രണ്ടും വാങ്ങി).

ടിങ്ങ് ടോങ്ങ്!

നേരം വെളുത്തപ്പോള്‍ തന്നെ കോളിങ്ങ് ബെല്ലടി കേട്ട് വാമഭാഗം വന്ന് വാതില്‍ തുറന്നപ്പോള്‍ കാണുന്നത്, ഇടത് കയ്യില്‍ ചൂണ്ടയും, വലതുകയ്യിലെ പ്ലാസ്റ്റിക് ബാഗില്‍ നിറയെ മീനുമായി വിജയ ഭാവത്തില്‍ നില്‍ക്കുന്ന എന്നേയാണ്.

പ്ലാസ്റ്റിക് ബാഗ് തുറന്ന അവള്‍ ഞെട്ടി പോയി, രണ്ട് ഐക്കൂറയും, നിറയെ ശേരിയും. അവളുടെ കണ്ണുകള്‍ തിളങ്ങി.

അയ്യോ, ഇത്ര പൈസയൊക്കെ ചിലവാക്കി ഉറക്കമൊളിച്ച് നിങ്ങള് ചൂണ്ടാന്‍ പോകുന്നൂന്ന് പറഞ്ഞപ്പോള്‍ ഞാന്‍ കരുതിയില്ലാട്ടോ നിങ്ങള്‍ക്ക് ചൂണ്ടാന്‍ അറിയാമെന്നും, ഇത്രക്കു മീന്‍ കിട്ടുമെന്നും.


ഉം....നിനക്കൊക്കെ എന്നെകുറിച്ചെന്തറിയാം. നീ വേഗം ചായയെടുക്ക്.

ദാ ഇപ്പോ തരാം. നിങ്ങള്‍ കിടന്നോളൂ. ഉറക്കമൊഴിച്ച് ക്ഷീണിച്ച് വന്നതല്ലെ.

എന്തൊരു സ്നേഹം. അമ്പത് രൂപ പോയാലെന്താ? ഭാര്യക്കെന്തൊരു സ്നേഹം.

അതേ, ഇന്ന് രാത്രി ചൂണ്ടാന്‍ പോകുന്നില്ലെ? പിന്നീട് വന്ന വ്യാഴാഴ്ച വാമഭാഗം സന്ധ്യയായപ്പോള്‍ ഇങ്ങോട്ട് കയറി ചോദിച്ചു.

ഇല്ല ഇന്ന് നല്ല മൂഡില്ല (ചൂണ്ടയില്‍ കൊരുത്താനുള്ള ചെമ്മീനിനു 15, രാവിലെ ജുമൈറയില്‍ പോയി മീന്‍ വാങ്ങാന്‍ 35, അങ്ങനെ മൊത്തം 50 ദിര്‍ഹം നഷ്ടം, കൂടാതെ രാത്രിയിലെ ഉറക്കവും, ആര്‍ക്കു മൂഡുണ്ടാകാന്‍).

ആയിടക്കാണു ഞങ്ങളുടെ ഫ്ലാറ്റിലെ, സഹമുറിയന്മാരായി, അയ്യപ്പനും, കുടുംബവും വരുന്നത്.
എന്റെ വൈഫും, അയ്യപ്പന്റെ വൈഫും വളരെ നല്ല ചങ്ങാത്തത്തിലായി തീരാന്‍ ദിവസങ്ങള്‍ അധികം എടുത്തില്ല.

ഒരു ദിവസം എന്റെ വൈഫും, അയ്യപ്പന്റെ വൈഫും തമ്മില്‍ കിച്ചണില്‍ വച്ച് നടന്ന സംഭാഷണം ഇപ്രകാരം.

അതേ നിങ്ങള്‍ എവിടുന്നാ പലചരക്കും, പച്ചക്കറികളുമൊക്കെ വാങ്ങുന്നത്?

ഞങ്ങള്‍ സണ്‍ റൈസ് സൂപ്പര്‍ മാര്‍ക്കറ്റില്‍ നിന്നാ.

അത് ശരി. അപ്പോ മീനോ?

മീനോ? ദൈവം സഹായിച്ച് മീന്‍ കാശു കൊടുത്ത് വാങ്ങേണ്ടി വന്നിട്ടില്ല, ചേട്ടനും കൂട്ടുകാരും, കൂടി വ്യാഴാഴ്ച ചൂണ്ടാന്‍ പോകാറുണ്ട്.

ചൂണ്ടിയിട്ടു മീനൊക്കെ കിട്ടാറുണ്ടോ?

പിന്നില്ലെ? ചിലദിവസം വളരെ അധികം മീന്‍ കിട്ടുമ്പോള്‍ അവര്‍ തിരിച്ചത് കടലിലേക്ക് തന്നെ കളയും. അല്ലെങ്കില്‍ ഫ്രിഡ്ജിലിരുന്ന് വേസ്റ്റാവില്ലെ?

ദൈവമേ, അയ്യപ്പനും ചൂണ്ടുന്നത് ഭയങ്കര ഇഷ്ടമാ. ഇത് കേട്ടാല്‍ ഇനി അയ്യപ്പനും ചൂണ്ടാന്‍ പോകും. ഞാന്‍ അയ്യപ്പനോട് പറയട്ടെ.

ഇത് കേട്ട് നിന്ന എനിക്ക് ചെറിയ നെഞ്ചു വേദന തോന്നിയില്ലെങ്കിലേ അത്ഭുതമുള്ളൂ.

വാഴാഴ്ച വൈകുന്നേരം വാതിലില്‍ മുട്ട് കേട്ട് വാതില്‍ തുറന്ന എന്റെ മുന്നില്‍ അയ്യപ്പന്‍ പ്രത്യക്ഷപെട്ടു.

എന്താ അയ്യപ്പാ?

അതേ ചേട്ടാ, ചേട്ടന്‍ ചൂണ്ട എവിടുന്നാ വാങ്ങിയത്?

സിറ്റി സെന്ററില്‍ നിന്ന്. എന്താ അയ്യപ്പാ.

അല്ലാ, എനിക്കൊരു ചൂണ്ട വാങ്ങണമായിരുന്നു. ഇന്ന് വ്യാഴാഴ്ചയല്ലെ, നിങ്ങള്‍ ചൂണ്ടാന്‍ പോകുമ്പോള്‍ ഞാനും വരട്ടെ.

അയ്യപ്പാ, ഇന്ന് രാത്രി എനിക്കൊരു സുഹൃത്തിന്റെ വീട്ടിലാ ഡിന്നര്‍. അയ്യപ്പന്‍ വേണമെങ്കില്‍ എന്റെ ചൂണ്ട കൊണ്ട് പൊയ്ക്കോള്ളൂ എന്ന് പറഞ്ഞ്, കട്ടിലിന്റെ അടിയില്‍ പൊടി പിടിച്ചു കിടന്നിരുന്ന ചൂണ്ടയിലെ പൊടിയെല്ലാം തുടച്ച് കളഞ്ഞ് ഞാന്‍ എന്റെ ചൂണ്ട അയ്യപ്പനു കൈമാറി.

സന്തോഷപൂര്‍വ്വം ചൂണ്ട വാങ്ങി, ഐക്കൂറയും, ശേരിയും സ്വപ്നം കണ്ട് അയ്യപ്പന്‍ അന്ന് രാത്രി ചൂണ്ടാന്‍ പോയി.

പിറ്റേന്ന് അടുക്കളയില്‍ വിഷാദ ഭാവത്തില്‍ നില്‍ക്കുന്ന അയ്യപ്പപത്നിയോട് ഞാന്‍ അയ്യപ്പന് മീന്‍ കിട്ടിയോ എന്ന് തിരക്കി.

എന്റെ ശബ്ദം കേട്ടതും അയ്യപ്പന്‍ രംഗപ്രവേശനം ചെയ്തു. ചേട്ടാ, രണ്ട് മൂന്ന് മീന്‍ കിട്ടിയതായിരുന്നു. അപ്പോഴാ, പോലീസ് വന്നത്. ലൈസന്‍സില്ലാതെ ഫിഷിങ്ങ് പാടില്ലാന്നെഴുതി വച്ചിരിക്കുന്ന ബോര്‍ഡ് കണ്ടില്ലേന്ന് ചോദിച്ച്, 100 ദിര്‍ഹത്തിന്റെ ഫൈന്‍ എഴുതി തന്നതും പോരാഞ്ഞ് ചേട്ടന്റെ ചൂണ്ടയും അവര്‍ കൊണ്ട് പോയി.

ചൂണ്ടപോയാല്‍ പോട്ടെ അയ്യപ്പാ (കട്ടിലിന്റെ അടിയിലിരുന്നാലും, പോലീസ്റ്റ് സ്റ്റേഷനിലിരുന്നാലും സമാസമം).

ഇല്ല ചേട്ടാ, ഇനി ഞാന്‍ അങ്ങിനെ പിന്മാറില്ല. നാളെ ഞാന്‍ ലീവെടുക്കാന്‍ തീരുമാനിച്ചു. ഫിഷിങ്ങ് ലൈസന്‍സിനപ്ലൈ ചെയ്യണം. അത് കിട്ടിയിട്ട് ഞാന്‍ ചൂണ്ടും, ഐക്കൂറ കിട്ടുന്നത് വരെ ചൂണ്ടും. ഇതയ്യപ്പന്റെ വാക്കാ. അയ്യപ്പനൊരു വാക്കേയുള്ളൂ. അയ്യപ്പന്‍ വികാരാധീതനായി.

അയ്യപ്പന്റെ മുഖത്ത് ആത്മവിശ്വാസം ആളികത്തുന്നത് കണ്ടിട്ട് എനിക്ക് തന്നെ പേടിയായി.

പിറ്റേന്ന് ശനിയാഴ്ച സംഭവിച്ചത് ഇപ്രകാരം.

രാവിലെ പത്ത് മണിയോട് കൂടി സ്യൂട്ടൊക്കെ ധരിച്ച്, മുനിസിപ്പാലിറ്റിയുടെ കീഴില്‍ വരുന്ന ഫിഷറീസ് ഡിപ്പാര്‍ട്ട് മെന്റിലേക്ക് അയ്യപ്പന്‍ ചെല്ലുന്നു. പി ആര്‍ ഓ വിനെ കണ്ട് ഫിഷിങ്ങ് ലൈസന്‍സിനുള്ള ഫോം എല്ലാം വാങ്ങി മുന്നിലുള്ള ടൈപ്പിങ്ങ് സെന്ററില്‍ കൊടുത്ത് ടൈപ്പ് ചെയ്യിച്ചു. മുദീറിനെ (ഓഫീസര്‍) കാണുവാന്‍ ടോക്കണ്‍ എടുത്ത് കാത്തിരുപ്പ് തുടങ്ങി.

പതിന്നൊരയായപ്പോള്‍ അയ്യപ്പന്റെ ടോക്കണ്‍ നമ്പര്‍ വിളിച്ചു.

വാതിലില്‍ മുട്ടി അയ്യപ്പന്‍ ഭവ്യതയോടെ ചോദിച്ചു, മേ ഐ കമിങ്ങ് സര്‍?

യെസ് കമ്മിങ്ങ്.

അസലാമു അലൈക്കും സര്‍

വാ അലൈക്കുമുസലാം.

യു ഇന്തി?

യെസ് സര്‍.

ബൈഠോ.

താങ്ക്യൂ സര്‍. അയ്യപ്പന്‍ ഉപവിഷ്ടനാകുന്നു.

യെസ്, തെല്‍മി വാത് യു വാന്ത്?

സര്‍, ഐ വാന്റ് റ്റു അപ്ലൈ ഫോര്‍ ഫിഷിങ്ങ് ലൈസന്‍സ്.

മാഫി മുശ്കില്‍ ഹബീബി. യു ഗോട് ദി ഫോറം തൈപ്പ്ഡ്?

യെസ് സര്‍.

വെരി ഗുദ്. യു വാന്ത് സുലൈമാനി.

നോ സര്‍. താങ്ക്യു.

ഓകെ ഗിവ് മി യുവര്‍ ആപ്ലിക്കേഷന്‍ ഫോറം.

അയ്യപ്പന്‍ ഭവ്യതയോടെ ആപ്ലിക്കേഷന്‍ ഫോം കൈമാറി.

ആപ്ലിക്കേഷന്‍ ഫോം മൊത്തം നോക്കിയ മുദീറിന്റെ മുഖഭാവം ആകെ മാറി. സൌമ്യനായി സംസാരിച്ചിരുന്ന അയാളുടെ സ്വരത്തിലെ സ്വൌമ്യത നഷ്ടപെടുന്നത് വളരെ പെട്ടെന്ന് തന്നെ അയ്യപ്പന്‍ മനസ്സിലാക്കി.

ഹൌ മനി ബോട്സ് യു ഹാവ്? വണ്‍? റ്റൂ? ത്രീ?

ഐ ഡോണ്ട് ഹാവ് എനി ബോട്ട് സര്‍!

ഡു യൂ ഹാവ് എ ഷിപ്പ് ദെന്‍?

നോ ഷിപ്പ് സര്‍!

വാട്ട് യു ഹാവ് ദെന്‍?

ഐ ഹാവ് എ ഫിഷിങ്ങ് റോഡ് സര്‍!!!

@#$%%&* @&^%$#@ ഗെറ്റ് ഔട്ട് ഫ്രം ഹിയര്‍. കം തു വേസ്ത് മൈ റ്റൈം, ഹറാമി.

66 comments:

കുറുമാന്‍ said...

അയ്യപ്പന്റെ മീന്‍ പിടുത്തം - ഒരു തട്ടിക്കൂട്ട് കഥ

Mubarak Merchant said...

ഹഹഹ പാവം അയ്യപ്പന്‍. അങ്ങേരോട് ചൂണ്ടയിടാന്‍ ലൈസന്‍സ് വേണമെന്ന് പറഞ്ഞ പോലീസുകാരന്റെ തലയില്‍ ഇടിത്തീ വീഴും!!

കുറുമാന്റെ കാര്യം പിന്നെ പറയുകയേ വേണ്ടല്ലോ, അയ്യപ്പന്റെ പ്രാക്കെത്തീട്ടാ തലേലെ മുടി മുയുമനും പോയതെന്ന് ദുബായിക്കാര്‍ക്ക് മൊത്തം അറിയാം

കറുമ്പന്‍ said...

അയ്യപ്പനു ആദ്യത്തെ റീത്ത് എന്റെ വക

പോസ്റ്റ് കിടിലോള്‍കിടിലം !!!!!!

Dinkan-ഡിങ്കന്‍ said...

ഹഹ കുറുമാനേ അയ്യപ്പന്‍ ചേട്ടനും കസറി ട്ടാ.

പിന്നെ @#$%%&* @&^%$#@ ഗെറ്റ് ഔട്ട് ഫ്രം ഹിയര്‍. എന്താ കീമാന്‍ ശരിക്ക് വര്‍ക്കണില്ലേ? ചില അക്ഷരങ്ങള്‍ ആകെ അല്‍കുല്‍ത്തായി കാണുന്നു എന്താ ഇത്?

...പാപ്പരാസി... said...

ന്റെ ഡിങ്കാ! അത്‌ അറബി മുദീര്‍ അയ്യപ്പനെ അറബിയില്‍ ചീത്ത പറഞ്ഞതല്ലേ!കുറൂജീ,ഞാന്‍ കരുതിയത്‌ ഒരു വെല്ല്യ സംഖ്യ അയ്യപ്പന്‍ ലൈസന്‍സിനായി അടക്കേണ്ടിവരുമെന്നാണ്‌.എന്തായാലും ചിരിച്ചു രസിച്ചു.

മുസ്തഫ|musthapha said...

ഹഹഹ... അത് അയ്യപ്പന്‍റെ മേല് ചാരിയല്ലേ :)

ആ അറബീടെ സല്‍ക്കാരം കണ്ടപ്പോഴേ തോന്നി... ഇതു നല്ലതിനല്ലല്ലോന്ന് :)

Unknown said...

ഇത് കുറുമയ്യന്‍ എന്നോട് ഒരിക്കല്‍ കാഷ്വലായി പറഞ്ഞിട്ടുള്ള സംഭവമാണ് എപ്പൊളോ നമ്മള്‍ കൂടിയപ്പൊ. എന്തായാലും രസിച്ചു സംഭവം. :-)

ഈയുള്ളവന്‍ said...

കുറുജീ,

നല്ല ഫോമിലാണല്ലോ ഇപ്പോള്‍..?

ചെസ്സ് കളിക്കാം എങ്കില്‍ - മേശപുറത്തിരിക്കുന്ന കപ്പിയെടുത്ത് അവന്റെ തലക്കടിച്ച് കൊന്നിട്ട് ജയിലില്‍ പോയാല്‍ സമയം പോകാതിരിക്കുന്ന പ്രശ്നമേ വരില്ല എന്ന് മനസ്സില്‍ തോന്നിയെങ്കിലും, വികാരത്തെ വിവേകം കൊണ്ട് അടിച്ചമര്‍ത്തി ...

എന്ന ആത്മഗദവും,

ചൂണ്ടയില്‍ കൊത്തി വലിച്ചാല്‍ വെള്ളത്തിലേക്ക് വീഴാതെ നോക്കിക്കോ. ബര്‍ദുബായ് ക്രീക്കില് ഈയിടേയായി സ്രാവുകളുണ്ടെന്നാരോ പറയുന്നത് കേട്ടു

എന്ന കുറുമിയുടെ ഡയലോഗും ഇഷ്ടമായി.

അമരത്തിലെ അശോകനെപ്പോലെ മീന്‍‌പിടിക്കാനുള്ള ആ പോക്കും, എന്തോ പോയ ആരെയോ പോലെ ഒന്നും കിട്ടാതെയുള്ള ആ വരവും ഒക്കെ മനസ്സില്‍ കാണാന്‍ കഴിയുന്നുണ്ട്.

നന്നായിട്ടുണ്ട് കുറുജീ... പോരട്ടെ, അടുത്തതും പിറകേ തന്നെ പോരട്ടെ.. :)

TonY Kuttan said...

ഹഹഹ പാവം അയ്യപ്പന്‍.

എന്തായാലും കഥ കലക്കി...

മൂര്‍ത്തി said...

ഹഹഹഹ
സസ്പെന്‍സ് പൊളിഞ്ഞില്ല....പക്ഷെ അയ്യപ്പന്റെ മീന്‍ പിടുത്തത്തില്‍ അയ്യപ്പന്‍ അവസാന റീലിലേ വരുന്നുള്ളൂ...

ദീപു : sandeep said...

വീക്കെന്റ് ക്വാട്ടയെല്ലാം കീറി, സുഭിക്ഷമായി അത്താഴവും കഴിച്ച്, രാത്രി പതിനൊന്നു മണിയോട് കൂടി ചൂണ്ടയുമെടുത്ത്, അമരത്തില്‍ കൊമ്പനെ പിടിക്കാന്‍ കടലില്‍ പോകുന്ന അശോകന്റെ അതേ അഹങ്കാരത്തോടെ ചൂണ്ടയുമെടുത്ത് ..... :)

Haree said...

ഹ ഹ ഹ... കിടിലന്‍...
ആക്‌ച്വലി എന്തുകൊണ്ടാണ് മീനൊന്നും കിട്ടാതിരുന്നത്... അപ്പുറത്തിരുന്നവര്‍ക്കൊക്കെ കിട്ടിയിരുന്നു എന്നെഴുതിയല്ലോ, അവരെന്തായിരുന്നു ഗോതമ്പുമാവിനും ചെമ്മീനിനും പകരം ഉപയോഗിക്കുന്നത്?
--

പോക്കിരി said...

അതെയ് മീനുകളു കൂട്ടത്തോടെ അക്കമ്മോടാഷന്‍ ഷാര്‍ജയിലേക്കു മാറ്റീന്നാ കേട്ടേ...
അതോണ്ടായിരിക്കും കിട്ടാന്നെ..

ഈശ്വരാ എന്തോരു അലക്കാ അലക്കിയതു....
കുറുമാന്‍ജി കീടിലന്‍ പോസ്റ്റ്....

ശെഫി said...

efകലക്കി...

വിന്‍സ് said...

Kuruman, you are one hell of a writer man!

കരീം മാഷ്‌ said...

കുറുമാന്‍, വായിച്ചു രസിച്ചു.
അവസാ‍നമാകും തോറും രസം കൂടി കൂടി വന്നു.

Mr. K# said...

എന്‍‌റമ്മോ, ഒരിക്കലും പ്രതീക്ഷിക്കാത്ത ക്ലൈമാക്സ്. കലക്കന്‍ :-)

asdfasdf asfdasdf said...

കലക്കി കുറൂസ്.
അമരത്തിലെ അശോകനെപ്പോലെ മീന്‍‌പിടിക്കാനുള്ള ആ പോക്കും..
ബ്ലോഗിലെ മീന്‍ പിടുത്തത്തിനു മുമ്പ് ഇങ്ങനെ ഒരു റോളും കൂടി കളിച്ചിരുന്നു അല്ലെ. :)

P Das said...

ഐ ഹാവ് എ ഫിഷിങ്ങ് റോഡ് സര്‍!!! അറബി അയ്യപ്പനെ വെടി വയ്ക്കാഞ്ഞത് ഭാഗ്യം.
:)

krish | കൃഷ് said...

കുറു..50 രൂഫായ്ക്ക്‌ മീന്‍ വാങ്ങി കൊണ്ടുവന്ന് ഇത് ചൂണ്ടക്കിട്ടുപിടിച്ചതാണെന്നു പറഞ്ഞ പഹയാ.. അയ്യപ്പനെ മോഹിപ്പിച്ച് 100 രൂഫാ ഫൈനും അടപ്പിച്ചു.. ഇതാണ് സ്നേഹപ്പാര.
(അയ്യപ്പന്‍റെ ഒരു ദിവസം നഷടമാവുകയും ചെയ്തു, പോരാത്തതിന് അറബിയുടെ ദഹിക്കാത്ത തെറിയും ഫ്റീ)
മീന്‍പിടുത്തം ഗൊള്ളാം..

absolute_void(); said...

ഉഗ്രന് . അതിനപ്പുറം എന്തു പറയാന്. അവിടവിടെയായി ചിരിയുടെ മാലപ്പടക്കങ്ങള് ഒളിപ്പിച്ചു വച്ചിരിക്കുന്നു.

കുട്ടിച്ചാത്തന്‍ said...

ചാത്തനേറ്:“അയ്യപ്പന്റെ മുഖത്ത് ആത്മവിശ്വാസം ആളികത്തുന്നത് കണ്ടിട്ട് എനിക്ക് തന്നെ പേടിയായി.“

ഈ പോസ്റ്റ് അയ്യപ്പനെങ്ങാന്‍ വായിക്കാനിടയായാല്‍ ബാക്കീം ആളിക്കത്തും ആത്മവിശ്വാസമല്ല കുറുഅണ്ണന്റെ തലേലെ ബാക്കിയുള്ള മുടി.( ബാലന്‍സ് പ്രാക്കും കൂടി കിട്ടൂലെ)

ഉറുമ്പ്‌ /ANT said...

രസിച്ചു വായിക്കാന്‍ ഒരു ചൂണ്ട............................
നന്നായി......................
ആ ലൈസന്‍സ് എവിടെ കിട്ടും.....................?

അഞ്ചല്‍ക്കാരന്‍ said...

കുറുമാന്‍‌ജീ എന്തിനാ പാവം അയ്യപ്പനെ ചാരുന്നത്. പറ്റിയ അബദ്ധം സ്വയമേറ്റങ്ങ് പറഞ്ഞാ പോരെ. അതല്ലേ കൂടുതല്‍ നല്ലത്.

നീണ്ട പോസ്റ്റാണെങ്കിലും അല്പം പോലും മുഷിപ്പില്ലാതെ വായിച്ചു തീര്‍ക്കാന്‍ കഴിഞ്ഞു.

വെറുതെ പറയുന്നതല്ല. നല്ല അവതരണം.

Visala Manaskan said...

:) അടിപൊളി. ‘അയ്യപ്പന്റെ ഫിഷിങ്ങ് ലൈസന്‍സ്‘ എരമ്പി. വളരെ ഇഷ്ടായി.

ഇന്നലെ ഫാന്‍സിയില്‍ ഇരിക്കുമ്പോള്‍ ഫോണില്‍‍ നീ ഈ കഥ പറഞ്ഞതുകേട്ട് ചിരിച്ചിട്ട്, തൊട്ടടുത്തിരിക്കണ ബോംബെ ക്കാരി എന്നെയൊന്ന് നോക്കിയിട്ട് എണീറ്റ് മാറിയിരുന്നെഡാ...!!

K.V Manikantan said...

കുറൂ,
ഇപ്പോ താന്‍ പഴയ കുറുമാനായി... ഗോ എഹെഡ്!

ഇടിവാള്‍ said...

അത്താ!
അത്താണു കുറുമാന്‍!

ചിരിച്ചു പരിപ്പിളകി ..

** ഇനി മൃതോത്ഥാനം പോയിട്ട് മൃ എന്നു പറഞ്ഞാ തന്നെ വെടിവച്ചു കൊല്ലും! ങാഹ!

ഈ ലൈനേലങ്ങു പോയാ മതി ;)

ധൂമകേതു said...

കലക്കി കുറുമാനേ, ഇങ്ങേരുടെ ലൈന്‍ ഇതു തന്നെയാ. ഇടിവാളേ തോക്കൊന്നും കാട്ടി പേടിപ്പിക്കണ്ട, ഇങ്ങേരിനി ആ വഴി പോകില്ലെന്നു വിശ്വസിക്കാം.

ജനശക്തി ന്യൂസ്‌ said...

കുറുമാന്‍, നര്‍മ്മം നന്നായിട്ടുണ്ട്‌. എന്നാ...ലും മുതീറിനെക്കൊണ്ട്‌ അത്രയും പറയിക്കണമായിരുന്നോ.?

Rasheed Chalil said...

കുറൂ... (മൃതോത്ഥാനം എഴുതാന്‍ തുടങ്ങിയ ശേഷം ഒരു ‘ജി’ ചേര്‍ത്തിരുന്നു. അത് വെട്ടി) ഇത് കലക്കി മാഷേ...

വയറിലെ മസില് ബലപ്പെടുത്തുന്നത് ഇപ്പോള്‍ കുറവുണ്ടൊ... ? എവടെ ?

അന്ന് മുന്‍സിപാലിറ്റിക്കാര്‍ കണ്ടിരുന്നെങ്കില്‍ ആ അമ്പതിന്റെ കൂടെ നൂറ് കൂടി... പഴയ ഫോമിലേക്ക് തിരിച്ച് വരുന്നതില്‍ സന്തോഷം...

കുട്ടന്‍സ്‌ | S.i.j.i.t.h said...

കഥ കലക്കിമറിഞ്ഞു മാഷേ..ഇത് തട്ടിക്കൂട്ടൊന്നൂല്ല..

ഉപമകളും, ബ്ലോഗ്ഗേര്‍സിനിട്ടുള്ള കൊട്ടുകളും നന്നായി..

അടുത്തപ്രാവിശ്യം നാട്ടില്‍ വരുമ്പോള്‍ സിറ്റി സെന്ററീല്‍ നിന്നു ഒരു ചൂണ്ടേം വാങ്ങിപ്പോരെ..ആറ്റുമീന്‍ പിടിച്ച് നമുക്കാ വിഷമം അങ്ങു മാറ്റാം..അയ്യപ്പനേം കൂട്ടിക്കോ..

:)

ettukannan | എട്ടുകണ്ണന്‍ said...

ഇടിവാള്‍ പറഞ്ഞത്‌ ന്യായം... മൃതോത്ഥാനം എട്ടില്‍ നില്‍ക്കുന്നതാ എട്ടുകണ്ണനിഷ്ടം... :)...

കുറുമാനേ കഥ അടിപൊളി.. :)

ജിസോ ജോസ്‌ said...

അടിപൊളി !

sreeshanthan said...

പ്രിയ കുറുമാന്‍, ഇതിലിപ്പോള്‍ എന്തു കമന്റിട്ടാലും കുറഞ്ഞു പോകും.....പിന്നെ ഇനി മുതല്‍ പോസ്റ്റ് ഇടുമ്പോള്‍ ഒരു ദിവസം മുന്‍പ് അറിയിക്കണം. ഓഫീസിലിരുന്ന് വായിക്കാതിരിക്കാന്‍ വേണ്ടിയാണ്. ഓഫീസിലുള്ള മറ്റു സ്റ്റാഫുകള്‍ കരുതുന്നത് ഒന്നുകില്‍ എനിക്ക് വട്ടാണ്, അല്ലെങ്കില്‍ ഏതൊ പെണ്ണിനോട് ചാറ്റ് ചെയ്യുമ്പോള്‍ അവളുടെ കുളിരു കോരുന്ന സംസാരം കേട്ടിട്ട് ഞാന്‍ എം. എസ് ത്രിപ്പുണിത്തുറയെപോലെ കുലുങ്ങി കുലുങ്ങി ചിരിക്കുകയാണെന്നാണ്. പൊട്ടിച്ചിരി അടക്കിപിടിക്കുമ്പോഴാണ് കുലുങ്ങി ചിരി ആയി മാറുന്നതെന്നു അവര്‍ക്കറിയില്ലല്ലോ? കലക്കി മച്ചൂ, കലക്കി. ഈ വെള്ളിയാഴ്ചത്തെ കുപ്പി എന്റെ വക.

G.MANU said...

kallakan choondakkatha......haha

തറവാടി said...

:)

മനോജ് കുമാർ വട്ടക്കാട്ട് said...

പാവം, ആ അയ്യപ്പന്റെ പരിപ്പെടുത്ത് വറുത്തു. അല്ലേ? :)

സുല്‍ |Sul said...

കൊള്ളാം കുറു.

ഇതു ഞാന്‍ പണ്ടെവിടെയാ വായിച്ചത്??? അല്ലെങ്കില്‍ കുറു എന്നൊട് ഇതു പറഞ്ഞിരുന്നോ പണ്ട്? ആ എന്തെര് വരട്ടെ.... :)

-സുല്‍

Pramod.KM said...

:)
ഇത് നന്നായിട്ടുണ്ട് മാഷേ..

പട്ടേരി l Patteri said...

:)) :))
എന്നിട്ടെന്തായി...?
.
.
.
ഫിഷിങ്ങിനു പോകുമ്പോള്‍ ബോട്ടില്‍ പോകണം ... ഫിഷ് ഒന്നും കിട്ടിയില്ലെങ്കിലും ബോട്ടിങ്ങിനു പോയെന്നു പറയാമല്ലോ... പിന്നെ കടലില്‍ അഥവാ പോലീസ് വന്നാല്‍ തന്നെ ചൂണ്ട ഒക്കെ കടലിനടിയില്‍ (ഒളിപ്പിച്ച് ) വെച്ചാല്‍ മതിയല്ലോ....
അടുത്ത തവണ പോകുമ്പോള്‍ എന്നെയും വിളിക്കണേ..നെക്സ്ത് തൈം ..യു ഗൊ ഫിഷിങ്.. ദോന്ത് 4ഗെത്ത് റ്റു കാള്‍ മി. OK

ശാലിനി said...

രാവിലെ ഓഫീസില്‍ മറ്റുള്ള സ്റ്റാഫ് വരുന്നതിനുമുന്‍പ് വായിച്ചതുനന്നായി. അല്ലെങ്കില്‍ വട്ടാണല്ലേ എന്ന മട്ടിലുള്ള നോട്ടങ്ങള്‍ സഹിക്കേണ്ടി വന്നെനേ. നന്നായി ചിരിപ്പിച്ചു ഈ പോസ്റ്റ്.

അറബിയുടെ സംഭാഷണം വയിച്ചാണ് കൂടുതല്‍ ചിരിച്ചത്.

Kaithamullu said...

"ഉള്ള ബുദ്ധിയും, ഓര്‍മ്മ ശക്തിയും തന്നെ പാരയായിരിക്കുന്ന സമയത്താ അവന്റെ ഒരു ചെസ്സ് കളി....."

Unknown said...

ഒരു സാധാരണ ഓര്‍മ്മ കുറിപ്പ് പോലെ ആദ്യ വരികള്‍ തോന്നിയെങ്കിലും അവസാന വരിയിലെ ആ വിസ്ഫോടനം എന്‍റെ ഓഫീസില്‍ പലരേയും പൊട്ടിച്ചിരിക്കിടയാക്കി.
വളരെ നല്ല ഒതുക്കത്തോടെ ശുദ്ധ ഹാസ്യത്തോടെ അവതരിപ്പിച്ച അയ്യപ്പന്‍റെ മീന്‍ പിടുത്തം തലക്കെട്ട് ഒരു പക്ഷെ അത്ര പുതുമ നല്‍കുന്നില്ലെന്ന് പറയ്ട്ടെ.
തലക്കെട്ട് കണ്ടപ്പോള്‍ വേറെ എന്തോ എന്ന് ആദ്യം കരുതി വായിക്കാതിരുന്നു. പിന്നെ സമയമെടുത്ത് പതിയെ വായിക്കുകയും ചെയ്തു.
അഭിനന്ദനങ്ങള്‍
സ്നേഹത്തോടെ
ഇരിങ്ങല്‍

മെലോഡിയസ് said...

കുറുമാന്‍ ചേട്ടാ..സൂപ്പര്‍ ആയി ട്ടാ..കുറുമാനിക്ക് 50 ചിലവായലെന്താ..അയ്യപ്പനെ കൊണ്ട് 100 ചിലവ് ആക്കിപ്പിച്ചില്ലേ? പിന്നെ ആ അറബിയുടെ സംസാരവും അവസാനം ആ ഗറ്റൌട്ടും ഇഷ്ട്ടായി. നന്നായിട്ടുണ്ട് കുറുമാന്‍ ചേട്ടാ..ആശംസകള്‍!!

Anonymous said...

പോലീസു കാരന്റെ തള്ള് അപാരം തന്നെ... എന്റമ്മോ!!!

പിന്നെ കുറുമാനെ... ഇടക്കു വച്ചു... ദിര്‍ഹം മാറി രൂപയായതു ശ്രദ്ധിച്ചു കാണുമല്ലോ? (50 രൂപ)

Anonymous said...

മൃതോത്ഥാനം അവസാനിപ്പിച്ചോ?

മുസാഫിര്‍ said...

കുറുമാ‍ന്‍ , കഥ അസ്സലായി,പക്ഷെ ഇതു പോസ്റ്റ് ചെയ്യാന്‍ ഇത്ര താമസിച്ചാതെന്തേ ? വാമ ഭാഗംനാട്ടില്‍ പോകാന്‍ കാത്തിരിക്കുകയായിരുന്നെന്നു കുശുമ്പുള്ളവര്‍ പറയും.ഞാന്നല്ല കേട്ടോ !

സൂര്യോദയം said...

കുറുമാന്‍ ജീ... ഉഗ്രന്‍... കിടിലന്‍... നാട്ടിലും ഈ പരിപാടി ചെയ്തിട്ടുണ്ട്‌... പക്ഷെ ദിര്‍ഹത്തിനുപകരം ഇന്ത്യന്‍ രൂഫാ എണ്ണിക്കൊടുത്തിട്ടാ മീന്‍ വാങ്ങിയതെന്ന് മാത്രം.. :-)

മന്‍സുര്‍ said...

അല്‍പ്പം വൈകിയാന്നെങ്കിലും മുഴുവനും വായിക്കാന്‍ കഴിഞതില്‍ സന്തോഷം......ആ മധുരം നിറഞ നാളുകള്‍ ഇനി തിരിച്ച് കിട്ടുമോ.........എല്ലം ഇനി മനസ്സില്‍ നിറയും ഓര്‍മകള്‍ മാത്രം ..നന്‍മകള്‍ നേരുന്നു.

സസ്നേഹം
മന്‍സൂര്‍,നിലംബൂര്‍
കാല്‍മീ ഹലോ

വേണു venu said...

കുറുമനേ, രസിച്ചു.:)

Manoj | മനോജ്‌ said...

വളരെ രസമായി അങ്ങനെ വായിച്ചുപോയി... ഇഷ്ടപ്പെട്ടു. അടുത്തതിനായി കാത്തിരിക്കുന്നു... സ്നേഹപൂര്‍വ്വം..

Anonymous said...

അടിയന്തരമായി അയ്യപ്പന്റെ നമ്പരും വിലാസവും ഇവിടെ പ്രസിദ്ധീകരിക്കേണ്ടതാവുന്നു. പണി കൊടുത്താലും ഇങ്ങനെ പണി കൊടുക്കാവോ ആശാനേ, ഞാന്‍ അയ്യപ്പന്റെ പക്ഷത്താ..

sandoz said...

കുറൂസേ...അയ്യപന്റെ അഭ്യാസം കലക്കി....
ഹരീടെ സംശയം അങ് കണ്ടീല്ലാന്ന് തോന്നണു.....

ചുണ്ടയില്‍ മറ്റുള്ളവര്‍ ഇരയായി കൊളുത്തീത് എന്താന്നു ഒന്ന് പറഞ് കൊടുക്ക് കുറൂസേ...
അതോ ഇനി ഞാന്‍ പറഞ് കൊടുക്കണോ.....

ഷാനവാസ്‌ ഇലിപ്പക്കുളം said...

കുറുമാന്‍ജി, സംഭവം തകര്‍പ്പന്‍!
പാവം അയ്യപ്പന്‍ അയാള്‍ ചൂണ്ടയും വാങ്ങി പോകുമ്പോള്‍ ഒരിക്കലെങ്കിലും ഓര്‍ത്തിരിക്കില്ല പണികൊടുത്തതാണെന്ന്! ഇത് വായിച്ചുകഴിയുമ്പോള്‍ അയാളുടെ കണ്ണില്‍പെടാതെ സൂക്ഷിച്ചോ.

Jishad said...

ചിരിച്ചു ചിരിച്ച് ഒരു വഴിക്കായി.

പിന്നെ മൃതോത്ഥാനത്തിനും ഫാന്‍സ് ഉണ്ട് കേട്ടൊ.

Sona said...

അടിപോളിയായിട്ടുണ്ട്ട്ടോ..അപ്പോള്‍ കുറുമാന്‍ജിയ്ക്കു ചൂണ്ടയിടാന്‍ അറയില്ല അല്ലേ :)

ദേവന്‍ said...

കുറുമാന്റെ വീടും മുനിസിപ്പാലിറ്റി ആപ്പീസും തമ്മില്‍ നൂറു മീറ്റര്‍ പോലും ദൂരമില്ലാത്ത സ്ഥിതിക്ക്..
അറബി ആട്ടിയത് അയ്യപ്പനെയോ അതോ...? എന്ന് വര്‍ണ്യത്തിലാശങ്ക വരുന്നല്ലോ...

Unknown said...

കുറുമാനേ,

തകര്‍പ്പന്‍ കഥ,
നന്നായി രസിച്ചു.

നര്‍മ്മം രസിക്കാന്‍ കൂടുതല്‍ ആളുകളുണ്ടെന്നു കരുതി ഗൌരവ രചനകള്‍ ഉപേക്ഷിക്കരുത് .രണ്ടും താങ്കള്‍ക്ക് വഴങ്ങുന്നുണ്ട്.അവയും വായിക്കാന്‍ വായനക്കാര്‍ കാത്തിരിക്കുന്നുണ്ട്.

Anonymous said...

വായിച്ച് വായിച്ച് ചിരിച്ച വേറൊരു കഥയില്ല. കലക്കി കുറുമാനെ, കലക്കി. പറ്റുമെങ്കില്‍ അയ്യപ്പനെ ഒന്നു കാണിച്ചു തരണേ...

Kiranz..!! said...

ഹ..ഹ..കുറുവേ..കലക്കി,ഇത്തരം ഐറ്റങ്ങള്‍ ഇനിയും പൊരട്ടെ..!

പാച്ചേരി : : Pacheri said...

ഒന്നാന്തരം............

ഗുപ്തന്‍ said...

ഇതു കാണാന്‍ വയ്കി.. നന്നായിട്ടുണ്ട്...
ഏതായാലും “ഗോള്‍ഫ് - ടെരന്‍സ് ആശയം പുറത്തെടുത്തു.

ഏയ്, അതു വേണ്ട. അതൊരുജാതി കാല്‍ കാശിനു വകയില്ലാത്ത തെണ്ടിപിള്ളാരു കളിക്കണ കളി.“

ഇത് ആ റ്റൈഗര്‍ വുഡ്സ് ഒന്നും കാണണ്ട.. പാവം നാണിച്ചുപോവൂല്ലീ

SHANAVAS S.H said...

kollam ayyapante meenpidutham

പട്ടേരി l Patteri said...

ഇന്നു രാവിലെ ന്യൂസ് വായിച്ചപ്പോല്‍ ഈ കഥ ഓര്‍മ വന്നു !!!

http://archive.gulfnews.com/articles/08/05/17/10213768.html

ലിങ്ക് നാളെ ലിങ്കിയില്ലല്ലോ എന്ന് കരുതി ഫുള്‍ ഡീറ്റയില്സ് .... കുറുമഗുരു (അഥവാ മീന്‍ പിടുത്തക്കാരന്‍ അയ്യപ്പനെ നാളെയും പോലീസ് പിടിക്കതിരിക്കട്ടെ !!!

Fishing at your pleasure in the UAE
By Rayeesa Absal, Staff Reporter
Published: May 16, 2008, 23:39


Abu Dhabi: Summer is back with a blast of hot air and as the pace of life slows down, people head to the beaches to cool off, sail, paraglide or to fish.

With temperatures hovering around 46 degrees Celsius, early morning is the best time to fish or about three hours before dusk. Fishing season in the UAE runs from October to late May.

Fishermen's tales of someone catching a 59kg sailfish are true. But not many people know that you need to get a licence for recreational hook-line fishing in the UAE. The licence is given to residents of the UAE. There are also short-term licences for tourists.

In Abu Dhabi, the Environment Agency-Abu Dhabi (EAD) is responsible for licensing fishing activities.


--------------------------------------------------------------------------------


--------------------------------------------------------------------------------


"The licence assists in proper and sustainable utilisation of the country's natural resources and helps protect fish stock," says Thabit Zahran Al Abdul Salaam, Director of Marine Environment Research Centre.

"Marine resources are precious and a balance needs to be maintained. It is important that we know how many people go fishing and what the impact on our resources are."

The licensing system was established in 2003. Recreational fishing licences are valid for a year.

The Environment Agency has an agreement with major hotels, diving clubs, for tourists to obtain licences.

Last year Abu Dhabi issued 145 annual recreational fishing licences and 259 weekly recreational fishing licences.

In Dubai, Sharjah, Ajman, Fujairah and Ras Al Khaimah, the Municipality issues the licence.

What you need to know:

Some good spots for fishing:

After Jebel Ali Free Zone
Near Maktoum Bridge
Dibba
Dubai Creek
Behind Hyatt Regency
Types of fishes:

Kingfish, Barracuda
Emperor Snapper, Stingrays
Not allowed to fish:

Crab Squids
Small fish
Cost of annual recreational fishing licence:

Abu Dhabi-Dh 120
Dubai-Free
Sharjah-Dh50
RAK-Dh110
Ajman-Dh110
Fujairah-Dh50
Khor Fakkan–Dh50
Kalba, Dibba –Dh50
Documents required:

Passport copy (with valid residence visa for expatriates).
One passport-size photograph
Eligibility- 18 years or older
Processing time- 3 working days
Short-term licence can be got the same day.
If you own a boat:

Boat licence
Two photographs
Rent Contract

PS: ബോട്ടില്ലാത്തവര്‍ എന്നെ വിളിച്ചാല്‍ മതി ( കരാമ സെന്ററിലേക്കുള്ള വഴി ഞാന്‍ പറഞ്ഞുതരാം )

shaanu said...

good

Anonymous said...

Angne ayyapante meenpidutham govinda